حزب اللہ نے اپنے 2 شہید سربراہان کی نماز جنازہ و تدفین کا اعلان کردیا
بیروت: لبنان کی مزاحمتی تنظیم حزب اللہ نے اپنے 2 سابق سربراہان شہید سید حسن نصر اللہ اور شہید ہاشم صفی الدین کے جنازے اور تدفین کا اعلان کردیا۔
سیکرٹری جنرل حزب اللہ شیخ نعیم قاسم نے اپنے ویڈیو بیان میں اعلان کیا کہ شہید سید حسن نصر اللہ اور شہید ہاشم صفی الدین کا جنازہ اور تدفین 23 فروری بروز اتوار کو ہوگی۔
انہوں نے مزید کہا کہ سید حسن نصر اللہ کی شہادت کے دوماہ بعد تک جاری رہنے والی جنگ کی وجہ سے سیدحسن نصر اللہ کا جنازہ عوامی سطح پر نہیں کیا جاسکتا تھا جس کی وجہ سے ان کی امانتاً تدفین کی گئی تھی تاہم اب ان کی نماز جنازہ بڑے عوامی اجتماع میں ادا کی جائے گی۔
شیخ نعیم قاسم نے یہ بھی کہا کہ شہید مقاومت سیدحسن نصر اللہ کے ساتھ ان کے سمجھے جانے والےجانشین شہید ہاشم صفی الدین کی نماز جنازہ بھی ادا کی جائے گی۔
شیخ نعیم قاسم کاکہنا تھا کہ ہاشم صفی الدین کا جنازہ بھی بطور سیکرٹری جنرل حزب اللہ ہی ہوگا کیونکہ حسن نصر اللہ کی شہادت کے چند روزکے بعد ہی سید ہاشم صفی الدین کو سیکرٹری جنرل حزب اللہ منتخب کرلیا گیا تھا تاہم ان کے سیکرٹری جنرل بننےکے اعلان سے ایک، دو روز قبل ہی ان کو شہید کر دیا گیا تھا۔
شیخ نعیم قاسم کا کہنا تھاکہ حسن نصر اللہ کی تدفین لبنان کے دارالحکومت بیروت میں ہی ہوگی جبکہ ہاشم صفی الدین کی تدفین ان کے آبائی علاقے دیر قانون النھر میں ہوگی۔
خیال رہے کہ صہیونی فوج نے گزشتہ سال 27 ستمبر کو بیروت میں حزب اللہ کے ہیڈکوارٹر پر حملہ کرکے حسن نصر اللہ کو شہید کرنے کا دعویٰ کیا تھا اور حزب نے اگلے روز حسن نصر اللہ کی شہادت کی تصدیق کر دی تھی۔
بعد ازاں 5 اکتوبر کو بیروت کے جنوب میں صہیونی فوج نے شدید بمباری کی جس کے بعد 23 اکتوبر کو اسرائیل نے اس بمباری میں حسن نصر اللہ کے جانشین سید ہاشم صفی الدین کو شہید کرنے کا دعویٰ کیا تھا جس کے بعد حزب اللہ نے بھی ان کی بھی شہادت کی تصدیق کی تھی۔
